Issittoq pingaartilluinnarpaat
Andreas, Anna aamma Rasmus, Issittumi silaannaap pissusaanik ilisimatusartuusut naapikkit. Aallaavigisaat assigiinngeqaat. Assigiimmilli anguniagaqarput: Issittumi silaannaap pissusaata allanngoriatorneranik ilisimasaqarnerulernissarput. Pineqarpoq silaannaap kissassusaata qaffakkiartornera. Pineqarput sermersuaq immallu sikua aakkiartuinnartut. Aammattaaq pineqarput assaarsineq qinngallu nillertut aamma ilisimatusartunik allanik ilisimasanik paarlaasseqatigiittarneq. Tassami pingaartumik assiigiinngitsunik ilisimasalinnik naapitsinikkut, ilisimasat nutaat tupaallannarsinnaasullu pilersarput.
Rasmus Bahbah Nielsen – Sermip silaannaallu pissusaannik ilisimatooq (Data Scientist i Glaciologi og Klima) – GEUS
Rasmus Kalaallit Nunaanni silaannaap allanngoriartorneranut tunngasunik suliaqarpoq. Taamaaliortarporlu qaammataasianiit paasissutissat atorlugit, tassuunakkut sermip aakkiartornera qanorlu pinera pillugit pingaarutilinnik ilisimasaqalersarpoq. Rasmusip Kalaallit Nunaat silaannaallu pissusaa suliarissallugit soqutigisaraa, tassuunakkut nunarsuup tamarmi silaannaata pissusaa allanngoriartortoq nutaamik paasineqarsinnaammat. Tamatuma saniatigut aammattaaq nuannarilluinnarpaa asiliarluni, sermimukarluni, sikumukarlunilu pinngortitarsuaq inuit ikittuinnaat misigisagaattut misigisinnaagamiuk. (Videot qallunaatuujupput).
Anna Pedersen – SDU-mi DMI-milu Ph.d-nngoniaq
Annap silaannaap pissusaata pissusissamisuuginnartumik nikerartarneri ilisimasaqarfiginerulerniarlugit sulivoq, taamaalillunilu nunarsuaq tamakkerlugu silaannaap kissakkiartornerata kinguneri paasisaqarfiginerujumallugit. Issittoq nunarsuup kissakkiartorneranit immikkut sunnerteqqajaasarpoq, nunarsuullu tamarmi silaannaata nikerarneranut pingaaruteqarluinnarluni. Issittumi silaannaap nikerarfiisa suuneri paasissallugu pingaartuuvoq. Tamannalu Annap suliarivaa, nunarsuaq tamakkerlugu silaannaap pissusaanut ilusilianit paasissutissat misissornerisigut. (Videot qallunaatuujupput).
Andreas Stokholm – DTU Space-mi Ph.d-nngorniaq
Andreasip Titanic-ip umiuneratut ittumik pisoqaqqinnginnissaa suliariaa. Taamaaliorporlu immap sikua ilulissallu pitsaanerusunik assiliorlugit takussutissiarinerisigut, taakkuami Issittup imartaani angalaneq ulorianartunngortittarpaat ingerlaartuartuunertik pissutigalugu. Ukiuni 50-ini kingullerni sikumik ilulissanillu assiliat taamaattut assaannarmik suliarineqartarnikuupput. Andreasilli assit nutaat suliarisarpai, kunstig intelligens aamma nunarsuup qaammataasiamit assilineri atorlugit. Taamaaliornikkut sikumik ilulissanillu assiliat eqqornerusarput pilertornerusumillu nutarterneqarsinnaallutik. (Videot qallunaatuujupput).
Instruktion og klip: Mikkel Stolt | Foto og lydoptagelse: Bertel Henning/Svada Film
Silaannaap pissusaanik ilisimatusartut tumisiukkit
Uani Issittumit paasissutissat nutaanerpaat nammineq paasiniaavigisinnaavatit:
Sullivik (arbejdsbordet) tassaavoq nittartakkap ’maskiinaqarfia’. Tassani Issittumit paasissutissat nutaanerpaat takusinnaavatit, maannakkorpiaq pissutsinik takutitsillutillu sermersuup, immap sikuata, nunap qeriuaannartup aamma silaannaap ississusaata/kissassuaata qanoq pinerannik takutitsisunik.
Allaaserisat pingaarnerusutigut tunngaviusumillu ilisimasaqalersissavaatsit, paasissutissat Sullivimmiittut ataqatigiississinnaanngortillugit.
Suliassat apeqqutit pingaarutillit akissutissarsinissaannut ilitsersussavaatsit, aammali nittartagaq illit nammineerlutit paasisassarsiorfigisinnaavat.
Videot nassuiaataasut “Klimaets balancer” (silaannaap pissusaata oqimaaqatigiinneri) silaannaap pissusaa pillugu ataatsimoortumik oqaluttuutissavaatsit – naatsumik videoliat nassuiaataasut 20-t missaat atorlugit.
Immaqa siunissami silaannaap pissusaanik ilisimatusartunut ilaalissaatit?
Silaannaap pissusaanik ataatsimoortumik paasiniaaneq
Silaanaap pissusaanut pissutsit amerlalluinnartut aalajangiisuusarput. Tamarmik immikkut pingaaruteqarput. Tamarmik immikkut imminnut pingaaruteqarput. Aatsaat aallavittut periutsit assigiinngitsut atornerisigut tamakkiinerusumik paasisaqarsinnaavugut. Tamatumanilu pisariaqarpoq assigiinngitsunik suliallit itisiliillutillu paasisaminnik allanut ingerlatitseqqittarnissaat. Tamanna annertunnerusumik paasisaqarfigisinnaavat uani (Videot qallunaatuujupput):
Instruktion og klip: Mikkel Stolt | Foto og lydoptagelse: Bertel Henning/Svada Film